• 401
  recto

Type:Notarial
Language:Latin
Transcription Author: Matteo Mazzalupi
Published: yes
Publication Details: Identified by V. Mosconi, Apparato documentario, in Il Rinascimento a Urbino. Fra' Carnevale e gli artisti del Palazzo di Federico, exhibition catalogue (Urbino, 20 luglio – 14 novembre 2005), edited by A. Marchi and M. R. Valazzi, Milan, 2005, p. 275, doc. 155

• Transcription

Ratificatio promixionis facte nomine illustrissimi domini nostri etc. clericis Camere Apostolice. In nomine Domini, amen. Anno a nativitate Eiusdem millesimo CCCCLXXXI°, tempore sanctissimi in Christo patris et domini domini nostri Sixti divina providentia pape quarti, die sabati XIIIIa mensis iulii. Per hoc presens instrumentum cunctis pateat evidenter et sit notum qualiter, cum illustrissimus et excellentissimus dominus noster dominus Federicus, dux Urbini, Montisferetri ac Durantis comes etc., Regnis (!) capitaneus generalis Sancteque Romane Ecclesie confolonerius (!), volens civitatem suam Urbini, in qua ut plurimum ressidet, Deo devotibus relligionibus decorare, obtinuerit a sanctissimo domino nostro Sixto nonnullas gratias, videlicet quod prefatus sanctissimus dominus noster ecclesiam Sancti Lazari extra muros Urbini in monasterium erexerit ipsique sic erecte monasterium Sancti Angeli de Gaifa, Urbinat. diocesis, ordinis Sancti Benedicti, univit et incorporavit et demum tantum (?) erectum religiosis ac monacis Montis Oliveti vulgariter nuncupatis per cessionem uti decessum contulit et concessit, ac etiam expulsis primo monialibus ordinis Sancti Benedicti e monasterio Sancte Agate de dicta civitate, inpudice viventibus, monasterium prefatum in monasterium ipsius ordinis erectum monacis sive fratribus congregationis Sancti Secundi de Eugubio pariter contulit et concessit, nec non preposituram cum septem prebendis in ecclesia cathedrali Urbini existentem extruxit ac unum archidiac[o]natum et duas prebendas auxit, ut in dictis gratiis et litteris de et super inde confectis, ad quas se refert, continetur, et quod Petrus de Felixiis de Urbino, illustrissimi prefati ducis apud Sedem Appostolicam orator, coram clericis Apostolice Camere solepniter promixerit, casu quo dicte gratie suum sortite fuerint effectum, pro expeditione earundem annatam de et pro omnibus prefatis gratiis solvere nomine prefati illustrissimi domini ducis et quod prefatus illustrissimus dux infra certum terminum omnia et singula per dictum Petrum de Felixiis promissa ea occaxione ratificaret et aprobaret ac rata, grata et firma haberet, hinc est quod prefatus illustrissimus dux noster Federicus, de predictis omnibus plenam notitiam habens et se habere asserens, ex certa scientia omnia et singula gesta et promissa per dictum Petrum eius oratorem prelibatis clericis ratificavit et aprobavit et per presentem contractum ratificat et aprobat, promixitque per se et suos heredes et successores mihi Antonio notario infrascripto, tamquam publice persone, stipulanti et recipienti nomine et vice dicte Apostolice Camere et omnium et singulorum quorum interest vel intererit, predicta omnia promissa per dictum Petrum occaxione predicta se perpetuo firma, rata et grata habere et tenere, contra non facere, dicere, opponere vel venire per se vel alios aliqua ratione vel causa, et quatenus opus esset nova promixione et obligatione, promixit mihi notario, ut supra stipulanti et recipienti, solvere dictam annatam dicte Camere Apostolice et clerici presidentibus de et pro omnibus gratiis predictis infra terminos deputatos postquam dicte gratie eorum sortite fuerint effectum, et ita se obligavit solepniter et in forma Camere consueta, rogans me notarium ut de predictis publicum conficiam instrumentum. Acta fuerunt predicta in civitate Urbini in pallatio prefati illustrissimi ducis, posito in platea magnia eiusdem civitatis iuxta vias publicas, muros dicte civitatis et alia latera, et in quadam camera dicti pallatii etc., presentibus nobilibus viris Comandino quondam Venture de Tarisano (?) secretario et magistro Francisco de Senis architectore dicti illustrissimi domini ducis testibus ad predicta vocatis, habitis et rogatis. Et ego Antonius ser Simonis Antonii de Vannis de Urbino […].