• 
  unpag
• 
  unpag

Type:Personal Letter
Language:Latin
Transcription Author: Gaetano Milanesi
Published: yes
Publication Details: Published by G. Gaye, Carteggio inedito d'artisti dei secoli XIV. XV. XVI., I, Florence, 1839, pp. 289-290, doc. CXXVII, and by G. Milanesi, Documenti per la storia dell’arte senese, Siena, 1854, II, pp. 429-430, doc. 307.
Notes: Transcription by G. Milanesi revised by M. Mazzalupi.

• Transcription

Magnifici domini tanquam fratres nostri charissimi, arbitramur Magnificentias Vestras non latere a maioribus nostris aedem Divae Mariae in urbe nostra Mediolano dicatam, et amplitudine et eleganti structura memorandam, inchoatam fuisse, a qua cum nunquam cessatum sit, eo nunc perducta est ut parum ab absolutione abesse videatur tantunque ut fornix seu, quemadmodum vulgo dicitur, tiburium extruatur restat; que, quo plus ipsi templo dignitatis et ornamenti est allatura, eo et caeteris membris est difficilior maiusque ingenii acumen desiderat. Hanc vero cum in presentia faciendam locare decreverimus multique qui in architectura prestantes habentur archetypum seu modellum ad nos attulerint, statuimus omnino ex aliis etiam locis architectos arcessere, quo et ex sententia magis et ex loci dignitate perfici possit. Quare, cum intellexerimus magistrum Franciscum Georgium urbinatem in arte architectonice plurimum excellere, visum est de eo cum Magnificentiis Vestris agere, quas hortamur et rogamus ut non solum ipsi magistro Francisco ad nos veniendi comeatum ac facultatem dare, verum etiam iubere velint. Cui, si eius iudicium in huiusmodi fornice deducenda ceteris prestantius censebitur, id negocii quam libentissime dabitur sicque tractabitur ut nunquam futurum sit ut eum huc venisse peniteat. Hoc nobis ita gratum cadet ut hoc tempore gratius nihil a Vobis proficisci possit. Viglevani, die XVIIII° aprilis 1490. Ioannes Galeaz Maria Sfortia Vicecomes dux Mediolani etc. B. Chalcus.