Italian Renaissance Document Site

XV maii 1490 Mediolani Duci scriptum est: Tanta est enim Vestre Illustrissime Dominationi multis probata argumentis erga nos benivolentia, ut non modo ei aliquid denegare phas esse non arbitremur, verum, si quid gratum facere contigerit nobis, nostris inservire commodis iure videremur. Quapropter, Vestris acceptis licteris, que magnam semper nobis afferunt iocunditatem, illico Franciscum, haud urbinatem, verum senensem, concivem nostrum dilectum nostreque etatis optimum architectum, accersiri iussimus, cui et Vestre Illustrissime Dominationi e vestigio adeat et illi haud secus ac nobis ipsis obtemperet imperavimus, quem Vestro desiderio facturum satis non dubitamus. Nec nobis dubium est Vestra Illustrissima Dominatio, ut ipsa suis licteris pollicetur, magnam liberalitatem experietur. Cuius architecti virtutem, etsi per se ipsam comendetur, pro ea tamen qua cives nostros complectimur charitate, Vestre Illustrissime Dominationi summopere commendamus. Sed quum multa inchoata reliquit ac nobis quoque eius architectonica ars quottidie usui evenit, Vestram Illustrissimam Dominationem plurimum oramus ut virum ad nos, peracto opere, remittere dignetur, quod sui acumine celeritateque ingenii ipsum brevi, quoad suum erit, vobis dilectum daturum credimus. Sed hoc nihil est enim pre nostri gratificandi animi desiderio, quum quidem quanti Vestram Illustrissimam Dominationem faciamus semperque fecerimus quantive nos ab ea fieri intellexerimus, nos ipsi testes sumus. Quam ob rem tantum eius erga nos affectum summamque benivolentiam nulla unquam poterit delere vetustas. Cui que prestare possimus, ea semper cum libenter tum etiam periocunde efficiemus. Quod eorum est, quorum spectata et benivolentia ac vera devotio quam erga Vestram Illustrissimam Dominationem semper habebimus, cui et patriam et statum hunc nostrum plurimum commendamus.

The Signoria of Siena informs the Duke of Milan that it has ordered Francesco di Giorgio to go to Milan, asking however that he return as soon as possible.