• 221
  verso

Type:Institutional record
Language:Latin
Transcription Author: Gaetano Milanesi
Published: yes
Publication Details: Published by G. Milanesi, Documenti per la storia dell’arte senese, Siena, 1854, II, p. 434, and in Annali della Fabbrica del Duomo di Milan dall'origine fino al presente, published by its administration, III, Milan, 1880, p. 55
Notes: Transcription by G. Milanesi revised by M. Mazzalupi.

• Transcription

MCCCC°LXXXX°, die martis XIII mensis aprilis. In domibus residentie contrascripti reverendisssimi domini archiepiscopi mediolanensis, sytis et se tenentibus cum domibus magnifici domini capitanei iustitie Mediolani, consedentes una hii contranominati reverendus, venerabilis magnificusque et spectabiles domini pro consultandis deliberandisve rebus que pertinent ad utilitatem incrementumque et honorem venerabilis fabrice sacri templi ecclesie maioris huius inclite civitatis Mediolani, facta propositione de damno et incomodo non parvo quod predicte fabrice ex eo sequitur, quia ipsa venerabilis templi fabrica nulum habet inginiarium qui ad perfitiendum tuburium prememorate ecclesie ipsamque ecclesiam sufitiens esse cognoscitur, quodque pluries scriptum fuerit magnificis et preclaribus oratoribus illustrissimi domini ducis Mediolani etc. existentibus apud sumum pontificem, regem Cicilie, dominationem Venetiarum et Florentiam, qui non rescripserunt in dictis partibus ullum invenisse inginierium ydoneum et sufitientem ad ipsum tuburium perficiendum, quapropter predicti domini, pluries inter eos habita matura consultatione sumptisque opportunis informationibus de sufficientia, rectitudine et experientia architectorum seu inginiariorum hac in civitate et ducatu Mediolani comorantium ipsorumque disputationes (!) auditis, existimarunt magistrum Iohannem Antonium Amadeum et magistrum Iohannem Iacobum Dulcebonum ceteris omnibus prevalere, quos predictis attentis eligerunt et ex nunc presentium tenore eligunt in architectos seu inginiarios ad ipsum tuburium ecclesiamque perficiendum. Declarantes tamen ac volentes quod ipsi ambo inginiarii seu architecti eligant modelum eis placibilem ex modelis in predicta fabrica existentibus, quem reducant ad illam perfectionem prout eorum prudentie videbitur. Iniungentes ac deliberantes et presentium tenore ordinaverunt et deliberarunt medelum (!) ipsum videri et iudicari debere, an ad perfectionem erit reductum vel ne, per magistrum Franciscum de Georgiis de Urbino, habitantem in civitate Sene, et per magistrum Lucam florentinum, habitantem in civitate Mantue, quos ex nunc presentium tenore eligerunt et eligunt in iudices et scrutatores perfectionis ipsius modeli.