Italian Renaissance Document Site

Non nos fefellit opinio, Illustrissimi Domini, si prius amare ceperimus quam nosce (!) virum omni laude dignum Franciscum Georgium concivem Vestrum. Is, intercedente apud Dominationes Vestras illustrissimo principe nostro, pro firmando tuburio huiusce admirandi templi, quod per retroacta tempora variantibus hominum ingeniis diversimode ceptum et demolitum est, ad nos iussu Vestro venit et, visis videndis, in magno civium et architectorum numero qui vocati erant ita ornate et modeste diseruit ut, quod impossibile quodammodo videbatur, omnia explanavit, ut iam securi sumus, propitiante gloriosissima Virgine Maria, cuius auspiciis tam preclaro operi initium datum est, constanti animo ad perfectionem cum securitate perduci posse, et quod nil gratius nilve iocundius prelibato principi nostro et huic populo effici posset. Et non imerito, cum tam admirandum templum, quod cum omni antiquitate comparari potest, ex tiburii varietate imperfectum existeret. Quare non quas debemus, sed possumus, Dominationibus Vestris gratias habemus quod liberaliter ad nos misseritis preclarum hoc ingenium, ad cuius arbitrium, precedentibus evidentissimis rationibus suis, tante rei ambiguitas demandata est, cuius consilium sequuturi sumus. Eumque ad Dominationes Vestras remittimus et, si eum condignis premiis non donavimus quenadmodum (!) ingenii magnitudo requirebat, equo animo ferat, quia Imaculata Virgo meliores fructus sibi allatura est. Quod reliquum est, Dominationibus Vestris nos perpetuo comendatos facimus, essetque singularis gratie posse aliquid efficere quod gratum esset eisdem Dominationibus Vestris. Valete. Ex camposancto prefati sacri templi maioris Mediolani, die octavo iullii 1490. Excellentissimarum Dominationum Vestrarum deputati regimini fabrice antedicti sacri templi etc.

The deputies of the Milan cathedral worksite inform the Signoria of Siena that they will follow Francesco di Giorgio's designs, and sing great praises of him.