• 47
  recto

Type:Communal record
Language:Latin
Transcription Author: Scipione Borghesi e Luciano Banchi
Published: yes
Publication Details: Identified by G. del Rosso, 'Lettere antellane sopra le opere e gli scritti di Francesco di Giorgio Martini architetto pittore e scultore sanese ec. Lettera III', Giornale arcadico di scienze, lettere ed arti, XVIII, 1823, pp. 113-114, and published by S. Borghesi and L. Banchi, Nuovi documenti per la storia dell’arte senese. Appendice alla raccolta dei documenti pubblicata dal comm. Gaetano Milanesi, Siena, 1898, pp. 334-336, doc. 169 (omettendo il giorno).
Notes: Transcription by Scipione Borghesi and Luciano Banchi revised by M. Mazzalupi.

• Transcription

Die lune dicti mensis iunii. Ad laudem omnipotentis Dei eiusque gloriose matris Marie semper Virginis et totius celestis curie Paradisi et ad eternam rei memoriam fit mentio qualiter, existente quadam figura Virginis Marie picta in angulo calcinarii existentis extra muros civitatis Cortone, loco dicto Querciaguazza, que figura per plura tempora precedentia fecit miracula et divinas fuit largita gratias eidem recurrentibus cum pietate mentis et sinceritate cordis, que fuerunt in [non] parva fama, successit deinde, concedente Domino, maior devotio populi ad dictam figuram, que in die prima Pasce Resurrectionis Domini nostri Yhesu Christi in anno Domini millesimo quadringentesimo octuagesimo quarto manifestissimas gratias universo populo concurrente exhibuit, crevitque successive in tantum devotio populorum ad dictam figuram non solum civitatis et comitatus Cortone, sed etiam omnium circumstantium, adeoque multitudo populorum diversorum oppidorum et villarum comitatus civitatis Perusii, Aretii, Civitatis Castelli et multorum aliorum locorum collegialiter suplicantium cum oblationibus conflussit. Et cum talis locus esset consortii Artis calzolariorum dicte civitatis Cortone, ipsi calzolarii ceperunt habere curam loci et oblationum et se contulerunt Sedi Apostolice, residente summo pontifice Sixto IIII° de civitate Savone, ordinis minorum Sancti Francisci, umiliter supplicantes ut sineret Eius Sanctitas eisdem ut patronis habere curam et administrationem devotionis loci et oblationum, et sic permisit eisdem, confectis desuper litteris apostolicis. Et his divulgatas est forma (fama?) devotionis predicte fere per omnem Italiam et chotidie evenerunt miracula in vere penitentibus, qui gratias receperunt de diversis infirmitatibus et periculis. Successit exinde quod dicti calzolarii, bonis respectibus moti, voluerunt Commune dicte civitatis Cortone habere preheminentiam et administrationem in dicto locho pro medietate cum ipso consortio, que conventio prout ad chartas c. 5 in eodem, et ipsa conventione conclusa et peracta, fuerunt electi per dictum Commune tres cives cortonenses, videlicet unus pro quolibet terzerio, in suprastantes et gubernatores dicti loci, quorum nomina habentur supra ad cartas 7. Et ipsis gubernatoribus cupientibus constructionem templi in dicto loco in honorem omnipotentis Dei et eius Matris, quidam Franciscus de Senis, singularis architector residens ad servitia illustrissimi domini Phederigi ducis Urbini, venit in eorum notitiam, qui ad eorum requisitionem se contulit ad dictam civitatem Cortone et, viso locho et situ edifitii fundandi, construxit formam templi scultam in ligno, secundum cuius formam suprascripta die fuit fundatum dictum templum modo et ordine infrascripto. Existentibus choadunatis in ecclesia Sancti Andree fratribus quator religionum, videlicet Sancti Dominici, Sancti Francisci, Sancti Augustini et Sancte Marie Servorum, et Sotietatis Yhesu et Sancti Nicholai et ipsis procesionaliter procedentibus cum universo populo, se contulerunt ad dictum locum, cui solemnitati non interfuit clerus presbiterorum, inhibente eidem domino Christoforo Ugolini de Marchionibus de Pratella episcopo cortonense, residente castellano in arce civitatis Spoleti pro dominio Ecclesie, residente Innocentio octavo yhanuensi summo pontiffice. Et celebratis ceremoniis ecclesiasticis debitis et requisitis et divino officio peracto, existente ministratore reverendo patre fratre Augustino magistri Egidii, Spice (?) Alisei de Cortona in sacra theologia magistro ordinis Sancti Dominici, Silvester Iuliani de Ciaffinis de Florentia, pro excelso dominio florentino capitaneus dicte civitatis Corotne, habens in suis manibus quandam petram marmoris albam spatii unius quarti brachii longitudinis, volens eam pro prima petra fundamenti templi pridie in terram mictere, ablata fuit ipsa petra de manibus suis a circumstantibus, quam obsculata fuit magnia pars multitudinis gentium in locho choadunatorum, et deinde sibi reddita in suis manibus, ipsam inmisit in dictis fundamentis in angulo sinistro tendente versus planitiem.