Italian Renaissance Document Site

Die suprascripto. In camera venerabilis Fabrice ecclesie maioris Mediolani existentibus congregatis contrascriptis dominis, salvis predictis reverendisssimo domino archiepiscopo eiusque vicario venerabilibusque dominis ordinariis assentibus, nonnulla negotia peragere habentibus, qui inter alia predicte Fabrice negotia pertractanda vocari fecerunt magistrum Franciscum de Georgiis ingeniarium dominationis Senatorum (!), tandem post multa dicta proposita et ventilata circa tuburium perficiendum, interrogatus fuit ipse magister Franciscus si hospitium domini Iohannis Antonii de Glasiate est ei gratum vel ne, qui magister Franciscus responsum dedit non solum ei esse gratum, sed gratissimum. Qua responsione sic habita, exortarunt ipsum magistrum Franciscum ad bene considerandum ea que ad perfitionem operis tuburii requiruntur. Predicti domini deputati, habito coloquio cum dicto magistro Francisco, qui letanter retulit de societate ipsius domini Iohannis Antonii contentari, matura inter eos super salario expensarum ipsi magistro Francisco per dictum dominum Iohannem Antonium prestandarum habita consultatione, deliberaverunt salarium dictarum expensarum quas ipse dominus Iohannes Antonius facit ipsi magistro Francisco et eius famulo a die quo tetigit Mediolanum in antea taxari debere et ex nunc presentium tenore taxaverunt et taxant et ordinaverunt et providerunt dictum salarium dictarum expensarum ipsi domino Iohanni Antonio responderi debere ad computum librarum duarum imperialium singulo die pro tempo illo quo ipse magister Franciscus expensas habitabit in domo dicti domini Iohannis Antonii ad instantiam predictorum dominorum deputatorum predicte Fabrice.

Summary of the meeting between the archbishop of Milan, the deputati della Fabbrica del Duomo, and Francesco di Giorgio on the subject of the architect's lodging and his work on the church lantern.