Italian Renaissance Document Site

Rafaello Urbinati. Cum ad Principis Apostolorum phanum Romanum exaedificandum maxime intersit ut lapidum marmorisque materia, qua abundare nos oportet, domi potius habeatur quam peregre advehatur, exploratum autem mihi sit magnam eius rei copiam Urbis ruinas suppeditare, effodique passim omnis generis saxa fere ab omnibus, qui Romae quique etiam prope Romam aedificare aliquid, vel omnino terram vertere parumper moliuntur. Te, quo magistro eius aedificationis utor, cuiusque tum artis peritiam tum probitatem et perspexi multis in rebus, et probavi, marmorum et lapidum omnium qui Romae, quique extra Romam denum milium passuum spatio, posthac eruentur, praefectum facio ea de causa ut quae ad eius phani aedi ficationem idonea erunt, mihi emas. Quare mando omnibus hominibus, mediocribus, summis, infimis, quae posthac marmora quaeque saxa omnis generis intra eum, quem dixi, loci spatium eruent, effodient, ut te earum rerum praefectum de singulis erutis effossisve quam primum certiorem faciant. Id qui triduo non fecerit, ei a centum usque ad mille num[m]um aureorum, quae tibi videbitur mulcta esto. Praeterea, quoniam certior sum factus multum antiqui marmoris et saxi litteris monumentisque incisi, quae quidem saepe monumenta notam aliquam egregiam prae se ferunt, quaeque servari operae praetium esset ad cultum litterarum Romanique sermonis elegantiam excolendam, a fabris marmorariis eo pro materia utentibus temere secari, ita ut inscriptiones aboleantur, mando omnibus qui caedendi marmoris artem Romae exercent ut sine tuo iussu aut per missu lapidem ullum inscriptum caedere secareve ne audeant, eadem illi mulcta adhibita, qui secus atque iubeo fecerit. Dat. sexto Kalendis septembris, anno tertio, Roma.

Leo X names Raphael prefect of the archeological excavations of Rome: all excavated material bearing ancient inscriptions is to be seen by him before being worked.