• 32
  verso

Type:Notarial
Language:Latin
Transcription Author: Anna Falcioni e Vincenzo Mosconi
Published: yes
Publication Details: Published by L. Pungileoni, 'Elogio storico di Giovanni Santi pittore e poeta, padre del gran Raffaello di Urbino', Urbino, 1822, pp. 134-36, and by A. Falcioni - V. Mosconi, 'Apparato documentario. Regesti e trascrizioni, in 'Raffaello and Urbino. La formazione giovanile e i rapporti con la città natale', exhibition catalogue (Urbino, 2009), edited by L. Mochi Onori, Milan, 2009, pp. 309-310, doc. 327.

• Transcription

In nomine Domini, amen. Iohannes Sanctis de Peruzzolis de Urbino, sanus Dei gratia mente, sensu et intellectu, licet corpore languens, timens mortis periculum et nolens intestatus decedere, suarum rerum et bonorum omnium dispositionem per presens nuncupativum testamentum, quod dicitur sine scriptis, in hunc modum facere procuravit et fecit. In primis, cum ipsum mori [contigerit], iussit suum corpus sepeliri apud ecclesiam Sancti Francisci de Urbino, apud quam suam sibi ellegit sepulturam, cui ecclesie relliquit iure legati pro fabrica et reparatione eiusdem bononinos quatraginta. Item reliquit iure legati ecclesie Catredali, pro fabrica eiusdem, bononinos viginti. Item relliquit ditto iure ecclesie Sancti Sergii bononinos viginti similiter pro reparatione eiusdem. Item reliquit amore Dei Monti Pietatis de dicta civitate florenum unum. Item reliquit dicto iure ecclesie Sancti Berardini extra muros florenos duos pro fabrica et reparatione eiusdem. Item reliquit dicto iure ecclesie Sancte Clare de Urbino florenum unum pro fabrica et reparatione eiusdem. Item reliquit iure restitutionis domine Berardine, eius uxori et filie Peri Partis de dicta civitate, florenos sexaginta vel circa ad rationem 40 bononinorum pro floreno singulo, quos dixit habuisse pro parte dotium dicte domine Berardine promissarum per dictum Perum, prout de dicta receptione dixit constare in libris et codicibus ipsius Iohannis et manu eiusdem, quibus stare voluit et mandavit. Item reliquit dicto iure dicte eius uxori infrascriptas res et bona, videlicet unam camurram panni Londre cum manicis rasi cremesini. Item unam aliam camurram, vulgariter dicto uno boccaccino, cum manicis rasi pavonazzi cum suis fulcimentis. Item unum par linteaminum subtilium laboratorum. Item unum par guancialium laboratorum. Item quatuor panigellos accie et floris, duos laboratos et alios non. Item reliquit dicte eius uxori iure legati anulos quatuor auri cum gemmis et sine, cum quibusdam [cingulis] seu cintis et quibusdam cuffis et velettis existentibus penes ipsam eius uxorem. Item iussit, voluit et mandavit ipsam indui tempore mortis ipsius testatoris pannis lugubribus iuxta mores regionis et consuetudinem. Item reliquit, iussit, voluit et mandavit dictam dominam Berardinam eius uxorem dominam, massariam et usufructuariam in domo ipsius testatoris, tantum donec vitam vidualem honestam et castam servaverit et in dicta eius domo permanxerit cum infrascriptis suis heredibus et dotes suas tam habitas quam habendas non repetierit. Item iussit, voluit et mandavit infrascriptos eius heredes institutos habere arbitrium et liberam facultatem vendendi et alienandi de bonis et hereditate ipsius testatoris ad eorum libitum et voluntatem. Item iussit, voluit et mandavit dominam Sanctam, eius sororem et uxorem quondam magistri Bartolomei sartoris de Urbino infradictam, posse stare et habitare in domo dicti testatoris et in ea habere victum absque contradictione infrascriptorum suorum heredum. Item assignavit in peccuniis existentibus in quadam eius capsa ducatos centum et unum auri, computatis in iis ducatis trigintasex auri in auro mutuatis per ipsum testatorem Arcangelo Peri Arcangeli de Urbino, ut patet per quandam scripturam privatam manu ipsius Arcangeli. In omnibus autem aliis suis bonis mobilibus et immobilibus, iuribus et actionibus, propriis et emphiteoticis, presentibus et futuris, ubicumque sunt et reperiri poterunt, suos heredes universales instituit domnum Bartolomeum eius fratrem, Raphaelem eius filium legiptimum et naturalem ex domina Magia, altera quondam eius uxore, et ventrem ipsius domine Berardine, si unum vel plures filios masculos peperit, equis portionibus et pleno iure, et si filiam feminam unam vel plures peperit, ei vel eis reliquit iure institutionis florenos centumquinqueginta pro qualibet pro earum dotibus, et [si] aliquis dictorum suorum filiorum tam nati vel nascituri ipsorum decesserit seu decesserint sine filiis legiptimis et naturalibus, seu aliquis ipsorum, tunc et eo casu substituit alium vel alios ut supra institutos supraviventes seu eorum filios masculos vulgariter et pupilariter et per fidecommissum absque deductione alicuius trebelianice quo ad dictos eius filios tam natos quam nascituros, quibus decendentibus substituit feminas, et si ipse femine decederent in pupillari etate vel postea quandocumque sine filiis, tunc eis substituit dictos eius filios masculos superexistentes et, ipsis tunc non extantibus, substituit dictum eius fratrem et dominam Sanctam eius sororem. Et si omnes predicti tam fratres quam filii, hoc est natus et nascituri mascoli, decederent in pupillari etate vel postea quandocumque sine filiis, tunc et eo casu substituit dictam dominam Sanctam eius sororem, si supervixerit, cui etiam decedenti substituit fraternitatem Sancte Marie infra institutam et substitutam. Si vero dicta domina Sancta non supervixerit, tunc et eo casu reliquit iure legati ecclesie Sancte Clare de Urbino florenos quinquaginta pro reparatione loci et ecclesie predicte, et dicto iure legati, dictis casibus evenientibus et non aliter, reliquit Ieronimo, eius nepoti ac filio Antonii Bartoli Vagnini de Urbino ex domina Margarita, eiusdem testatoris quondam sorore et quondam uxore dicti Antonii, florenos centum, solvendos et dispensandos (o dispendendos?) in utilitate dicti eius nepotis in bonis stabilibus, cui decedenti sine filiis substituit fraternitatem infrascriptam, et in relliquo suorum bonorum omnium instituit et substituit fraternitatem Sancte Mariae de Misericordia de Plano Mercati de Urbino. Tutorem autem et curatorem dicti eius filii, tam nati quam nasciturorum, fecit, constituit et esse voluit domnum Bartolomeum eius fratrem predictum, casu quo de iure esse possit, sin autem vel ipso decedente, ex nunc prout ex tunc instituit et esse voluit ser Lodovicum Baldi de Urbino. Fideicommissarium autem et huius testamenti dispositorem et executorem fecit et esse voluit Petrum Partis Simonis de Urbino eius socerum. Et hanc suam ultimam voluntatem asseruit dictus testator esse velle, quam valere voluit iure testamenti et, si iure testamenti non valeret, saltem valere voluit iure codicillorum vel alterius cuiuscumque ultime voluntatis qua melius de iure valere potest. Cassans, inritans et anullans omne aliud testamentum et ultimam voluntatem usque in presenti factam et maxime aliud testamentum manu mei sub die XXVI mensis iulii presentis anni, cui et omnibus aliis voluit presens prevalere et vires habere. Actum, factum, conditum et affirmatum fuit dictum testamentum et ultima voluntas per dictum testatorem et scriptum, lectum, publicatum et vulgarizzatum per me Lodovicum notarum infrascriptum in civitate Urbini in domo dicti testatoris, sita in dicta civitate in contrata Montis iuxta viam publicam, bona olim Iohannis Luce Zachagne, bona heredum Seraphini de Montefalcone et alia latera, sub annis Domini ab eius nativitate M°CCCC°LXXXXIIII°, indictione XII, tempore domini Alexandri pape VI, die vero XXVII mensis iulii, presentibus ser Iohanne Thoma magistri Troiani, Thoma Peri Becte, Francisco Arcangeli Bassi de Urbino, magistro Ambrosio Antonii de Mediolano cive Urbini, Perpaulo Iacobi ser Simonis, Benedicto Francisci Blaxine de Urbino et Evangelista Andree de Plano Meleti, testibus ad hec a dicto testatore ore proprio vocatis, habitis et rogatis. Et ego Lodovicus quondam Antonii de Alexandris de Urbino, de quatra Sancte Crucis, publicus imperiali auctoritate notarius, predictis omnibus et singulis interfui et ea rogatus scribere scripsi et publicavi signumque meum consuetum apposui. Dicto millesimo et die prima mensis augusti decessit dictus testator et ego interfui eius funeri et sepulture, et die X dicti mensis autenticavi et domno Bartolomeo restitui. Dicto M°CCCC°LXXXXIIII° et die XV ditti mensis augusti presens testamentum presentatum fuit registro Communis Urbini per dictum domnum Bartolomeum eademque die registratum fuit per me notarium infrascriptum. Et ego Matheus Gerii Venture de Accomandis de Urbino, de quatra Episcopatus, publicus imperiali auctoritate notarius et nunc notarius substitutus ad hoc loco ser Mathei de Oddis notarii dicti registri aliis occupati, prout in suo originali invenii de verbo ab verbum, nihil addendo vel minuendo, hic fideliter registravi, ideo hic me subscripsi signum nomenque meum apposui.