• 
  unpag

Type:Notarial
Language:Latin
Transcription Author: John Shearman
Published: yes
Publication Details: G. Amati, “Sopra due case possedute da Raffaele da Urbino”, in “Il Buonarroti”, NS I (III 1866) pp. 58-59; the present transcription is taken from J. Shearman, “ Raphael in early modern sources”, I, Yale University in association with the Bibliotheca Hertziana Max-Planck-Institut für Kunstgeschichte, New Haven and London 2003, pp. 213-16.

• Transcription

November 1515. Venditio domus pro domino Raphaele de Urbino pictore, per dominum Perinum de Jenariis de Caravagio, facta cum pacto de retrovendendo. Magister Perinus de Jenariis de Caravagio architector, sponte pro se et suis heredibus et successoribus, vendidit domino Raphaeli de Urbino pictori, licet absenti, et domino Baverio Charocii de Parma pictori ibidem presenti et pro dicto Raphaele stipulanti, quandam ipsius magistri Perrini domum positam in burgo Sancti Petri de Urbe in via Sixtina, cui ab uno latere est via publica, a duobus lateribus bona dominorum Antonii et Valerii de Porcariis, ab alio bona ipsius venditoris et alii veriores confines, cum annua responsione carlenorum quinque veterum dominis Antonino et Valerio prefatis de Porcariis, a quibus dictus Perrinus dictam domum alias emit pro infrascripto precio cum pacto rehemendi, in omnibus autem aliis liberam, exemptam ab omni onere census, pedagii et gabelle, una cum omnibus suis exitibus, introitibus, scalis, cantinis, salis et cameris, et omne et toto eo quod intra se et extra continet, ad habendum, tenendum etc. Et ex nunc, ex causa venditionis huiusmodi, cessit omnia jura que habet in domo predicta, et posuit dictum Raphaelem, licet absentem, in locum et ius suum universum, et constituit eum procuratorem ut in re sua propria. Et constituit se tenere dictam domum, nomine dicti Raphaelis donec idem Raphael, per se vel quicumque aliis per eum, possessionem acceperit pacificam. Hanc autem venditionem prefatus Perrinus fecit dicto Raphaeli pro ducatis ducentum auri de camera, quod pretium prefatus venditor ad se traxit, et de eisdem se bene contentum vocavit. Et si plus dicta domus valeret, etiam si dimidium iuxti pretii excederet, totum illud plus eidem domino Raphaeli donavit, eique dimisit. Pro quibus observandis idem Perrinus se obligavit sub penis Camere apostolice cum juramento. Actum Rome in domo mei notarii, presentibus ibidem Marco Antonio de Raimondis de Bononia et Johan[n]e Francisco Laurentii Florentino et Camere Apostolice mensuratore testibus. Dicta die viii.a novembris 1515 Nobiles viri domini Anthoninus et Valerius prefati, et quilibet eorum in solidum, certificati, advisati et ad plenum informati de supradicta venditione, et omnibus et singulis in ea contentis et specificatis, eidem in omnibus et per omnia consenserunt, et suos consensus pariter et assensus dederunt et prestiterunt. Salvo tamen, et reservato eisdem et cuilibet eorum pacto de dictam domum, totiens quotiens eis placuerit et visum fuerit, reemendo. Et promiserunt non contravenire per se vel alium seu alios sub pena damnorum. Actum Rome in ecclesia Sancti Augustini, presentibus dicto domino Marcantonio de Raimondis de Bononia et Johanne Baptista de Abbatibus de Parma testibus. Nicolaus Noiroti clericus Bisuntine diocesis, magistri Francisci Vigorosi Curie causarum Camere Apostolice substitutus, de premissis rogatus scripsit.