Italian Renaissance Document Site

[verso] Dilecto filio nostro Petro tituli Sancti Eusebii presbitero Cardinali Anconitano. F. Accoltis 26 octobre 1520 LEO PAPA Xs. Dilecte fili noster, salutem et apostolicam benedictionem. Pro eximiis tuis de Sedis Apostolice et Romane Ecclesiae benemeritis, ac preclaris gratiarum muneribus, quibus illarum largitor personam tuam insignivit attissimus [corretto: aptissimus], in hiis tibi libenter assistimus per quae tuis et successorum tuorum profectibus consulatur. Cum itaque sicut accepimus nuper cum tu, pro tui commoditate, domum quondam Raphaelis de Urbino laici, nuper in Urbe vita functi, in Burgo Sancti Petri dicte Urbis, juxta Alexandrinam ab uno et Sacram nuncupatas vias, ac plateam palatii bone memorie Dominici tituli Sancti Clementis presbiteri Cardinalis ab alio, nec non domos dilectorum filiorum Bartholomei Son[ica] veneti et Michaelis de Ruere ab alio lateribus consistentem, a dilectis filiis Balthasare de Piscia Datario et loanni Baptista de Aquila cubiculario nostro, executoribus testamenti dicti Raphaelis, emere velles, tunc Auditor Generalis Curiae Causarum Camerae Apostolicae seu eius locum tenens, ac etiam Gubernator dicte Urbis seu eius collateralis, ad tui instantiam, juxta mores et consuetudines seu statuta dicte Urbis, ac stilum curiarum suarum, edicta publica in pluribus locis ad id solitis et consuetis afigi, et collateralis curie Capitolei, et iam de Urbe ad id deputatus bannimenta publica per loca solita et consueta Urbis fieri commiserint, et decreverint. Ipsaque edicta et bannimenta per quae omnes et singuli super prefata domo ratione cuiuslibet obligationis ex testamento dicti Raphaelis, vel ab intestato, seu alias quomodocunque sua coniunctim, vel divisim interesse putantes quatenus ut infra certum in eis contentum terminum coram judicibus, vel Balthasare et Johanne Baptista executoribus prefatis, comparere deberent allegaturi omne illud quod sua pretendebant interesse seu jus habere in dicta domo ratione cuiuslibet obligationis, vel alias quomodocunque et recepturi justiciam, quatenus pro parte ipsorum existeret ac plenariam satisfactionem. Alioquin, dicto termino elapso et nemine ipsorum interesse putantium comparente et suum interesse allegante, visuri ipsis omnibus perpetuum silentium super omnibus juribus et obligationibus si quas habebant in ipsa domo imponi ac executoribus domum ipsam vendendi, et tibi illam emendi licentiam ab eisdem judicibus concedi citabantur per personas publicas ad id deputatas in locis solitis et consuetis respective affixa et facta fuerint. Et cum dicto termino postmodum elapso nullus qui juste venditionem domus huiusmodi impedire posset comparuisset, prefati judices omnibus et singulis in citationibus contentis perpetuum silentium desuper imposuerunt. Ac executoribus ipsis domum prefatam vendendi et tibi illam emendi liberam licentiam concesserunt. Et postmodum dilecti filii Aurelius de Caprinis de Viterbio Prior Sancti Angeli de Spata Viterbiensis diocesis, nec non Hieronymus Gotifredus civis Romanus de regione Parionis in prefata domo, seu ad ipsam jus habentes seu habere pretendentes respective, ac etiam quidam Simon et Augustinus fratres et filii quondam Baptiste Ciarle, et Lucia quondam Baptiste Ciarle de Urbino, et Rodolphus filius ipsius Lucie, et Madalena filia dicti condam Baptiste Ciarle uxor Francisci Johannis Luce de Urbino similiter pretendentes se tanquam heredes dicti Raphaelis ab intestato ad prefatam domum, seu in ea jus habere, eandem venditionem, ut prefertur, tibi factam ratificaverunt, ac quilibet etiam respective ratificavit prout in instrumentis desuper confectis quorum tenores perinde, ac si de verbo inserti essent pro expressis et insertis haberi volumus, plenius continetur. Preterea quum asserebatur domum prefatam Hospitali Sancti Spiritus in Saxia de Urbe, seu eius preceptori pro tempore existenti ad assertos census annuatim solvendos, seu alias aliter obligatam fuisse et esse, quorum censuum et obligationum quecumque sint quantitates causas et modos perinde, ac si presentibus insererentur ac vere et non ficte specificarentur, atque exprimentur pro expressis ac de verbo ad verbum individue insertis et specificatis haberi volumus. Idem Preceptor, deposita quadam pecuniarum summa pro emendis totidem censibus seu redditibus equalis valoris seu fructus eandem domum, seu te eius emptorem a prefatis censibus et obligationibus quibuscumque realibus et personalibus ac juribus, quibuscumque quae in dicta domo, seu ad eam prefato Hospitali etiam ratione caducitatis seu non solutione censuum aut laudemiorum quomodolibet competerunt seu competere possent, omnino liberavit et quietavit, et imperpetuum eandem domum liberam a dictis censibus et obligationibus esse voluit, ita ut in futurum ad dictos census seu obligationes nullatenus teneretur. Nec propterea tam tu quam etiam tui in dicta domo pro tempore successores nullatenus molestari possitis prout in instrumento desuper confecto quod perinde, ac si de verbo presentibus insereretur pro expresso et inserto haberi volumus, plenius continetur. Item, quia prefata domus obligata dicitur respective ad quosdam alios census diversis ecclesiis parrochialibus collegiatis et non collegiatis, seu aliis piis locis de Urbe annuatim pro tempore solvendos, quorum censuum equivalentia, seu recompensa per dictum Hieronymum Gotifredum eisdem ecclesiis, seu piis locis ut asseritur data fuit, et causa cui in evidentem utilitatem dictarum ecclesiarum seu piorum locorum cederent adhuc coram Vicario Urbis seu aliis pretensis judicibus pendere dicitur, quorum censuum ac ecclesiarum, seu piorum locorum ut prefertur nomina cognomina situationes quantitates causas et modos, necnon statum cause et causarum huiusmodi perinde, ac si de verbo ad verbum individue exprimerentur, seu specificarentur vere non ficte pro individualiter expressis et specificatis haberi volumus, plenius continetur. Nos, ne huiusmodi venditio, ratificationes, et censuum seu obligationum ut prefertur liberationes ullo unquam tempore infringi possint, sed maiorem et totalem ac omnimodam obtineant roboris firmitatem providere volentes, motuproprio, et ex certa scientia ac de apostolice potestatis plenitudine de omnibus et singulis premissis plenarie informati, ac certam noticiam habentes decreta super edictis affigiendis et bannimentis emittendis, ac citationibus prefatis faciendis, ac postmodum affixis, emissis et factis, ac nemine comparente perpetui silentii omnibus et singulis supradictis impositionem, necnon vendendi et emendi licentie concessionem per dictos judices, ut premittitur, factam, ac ratificationes et censuum ut prefertur liberationes seu recompensas, ut premittitur, datas vere et non ficte perinde ac si [sententie] quod in evidentem utilitatem dictarum ecclesiarum aut piorum locorum cederent late essent, prout nos harum serie eas in evidentem utilitatem tam dicti Hospitalis quam aliarum ecclesiarum et piorum locorum eiusmodi respective cessisse et cedere attestamur; decernimus et declaramus etiam si ex pecunia deposita, ut prefertur, census seu redditus huiusmodi in evidentem utilitatem dicti Hospitalis adhuc empti non forent, vel etiam si domus prefata ob non solutionem censuum seu laudemii, aut alias ex quavis ad prefatum Hospitale devoluta esset, seu ad illud pertineret, auctoritate apostolica tenore presentium motu, scientia et potestate similibus approbamus et confirmamus, ac respective validas seu validas et efficaces fore et esse et plenum firmitatis robur obtinere decernimus. Supplentes capituli dicti Hospitalis, ac ecclesiarum et locorum piorum predictorum consensus tractatus et alias solemnitates in alienatione rerum ecclesiasticarum requisitas, tam de jure quam de consuetudine, ex statutis seu privilegiis et induitis, etiam Pauli II predecessoris nostri, etiam per alios predecessores nostros confirmatis, ac omnes et singulos juris et facti defectus, ac nuliitates etiam dicti testamenti, etiam si testamentum prefatum, vel factum non fuisset, vel saltem quovis respectu invalidum esset, quoad effectum presentium dumtaxat, si qui forsan in premissis omnibus et singulis intervenerint et nihilominus pro potiori cautela omnibus et singulis supradictis, ac sua quomodolibet interesse putantibus super premissis omnibus et singulis censibus seu obligationibus, ac dicta domo respective perpetuum silentium de novo imponimus. Et insuper venditionem de dicta domo tibi iam factam, ac censuum et obligationum huiusmodi liberationes ex certa nostra scientia ac motu et potestatis plenitudine similibus tanquam de premissis omnibus et singulis plene informati, et certam etiam notitiam, ut prefertur, habentes auctoritate et tenore predictis similiter approbamus et confirmamus. Supplentes omnes et singulos defectus, si qui tam in testamento quam omnibus et singulis aliis supradictis intervenerint, necnon omnibus et singulis supradictis, tam ex testamento, quam ab intestato, tam ratione generalis, quam specialis ypothece seu causa vel occasione cuiuslibet actionis vel obligationis aut censuum seu obligationum liberationum huiusmodi seu etiam caducitatis ob non solutionem censuum seu laudemiorum, ut prefertur, aut alias quomodolibet, et ex quavis causa etiam pia, vel grandi consideratione sua interesse putantibus, ita ut ad ipsam domum vel census, seu obligationes huiusmodi ullo unquam tempore aspirare nequeant tuque de illa libere disponere, nec tu aut tui heredes et successores super premissis omnibus et singulis, de jure vel de facto, judicialiter vel extra judicialiter, nullo modo molestari possitis, perpetuum silentium imponimus. Volentes, ac motu, scientia et auctoritate similibus decernentes et declarentes, quod presentes de surreptione seu obreptione, aut defectu intentionis, aut ex quavis alia exceptione vel causa etiam pretextu juris quesiti ablati per comissiones etiam manu nostra signatas, aut regulas seu constitutiones nostras etiam de non tollendo jus quesitum factas seu etiam imposterum faciendas impugnari aut notari non possint, aut illis ex premissis, seu alia quavis causa vel grandi consideratione quomodolibet preiudicari. Et sic per quoscumque judices et commissarios et Sancte Romanae Ecclesiae Cardinales et causarum Palatii Apostolici Auditores in qualibet instantia pronunciari, sententiari et diffiniri debere sublata eis, et eorum cuilibet aliter judicandi, sententiandi, pronuntiandi et diffiniendi facultate et auctoritate, ac irritum et inane si secus super hiis a quoquam quavis auctoritate, scienter vel ignoranter, etiam per Nos et Sedem Apostolicam contingerit attemptari, non obstantibus premissis ac Urbis et Urbinatis et aliarum terrarum etiam juramento confirmatione apostolica vel quavis firmitate alia roboratis statutis consuetudinibus, reformationibus et decretis, necnon constitionibus nostris editis et edendis, ac comissionibus concessis et concedendis predictis, ac quibusvis privilegiis indultis et litteris apostolicis Hospitali seu ecclesiis aut piis locis prefatis, cum quibusvis clausulis quantuncumque fortissimis, ac confirmationibus etiam saepius reiteratis, quorum omnium et singulorum premissorum tenores, causas, modos et formas, ac clausulas perinde, ac si vere et non ficte de verbo ad verbum presentibus insererentur aut exprimerentur ita ut omnino tollantur pro individualiter expressis et insertis haberi volumus incontrarium forsan concessis, aut imposterum concedendis, quae adversus presentes nemini suffragari aut presentibus quomodolibet preiudicare posse nolumus, illisque omnino derogamus et derogatum esse volumus, ceterisque contrariis quibuscumque. Datum Insule, Portuensis diocesis, sub annulo Piscatoris die xxvi.a octobris MD.xx, pontificatus nostri anno octavo. Evangelista S

Breve di Papa Leone X nel quale si conferma l'acquisto della casa di Raffaello nel Borgo dfa parte del cardinale Pietro Accolti.