Italian Renaissance Document Site

[a margine] Concordia inter dominum Baldasarem Datarium et haeredum quondam domini Raphaelis de Urbino Die xviiii decembris 1520 Cum sit quod spectabiles viri domini Augustinus Baptistae de Ciarla et Rodulphus Joannis Lucae [Zaccagna] ac Joannes Baptista Simonis de Ciarla layci, necnon honestae mulieres dominae Magdalena filia quondam Baptistae Ciarle, et uxor Francisci Joannis Lucae [Zaccagna] de Urbino, et Constantia filia dicti Francisci, ac Lucia [Zaccagna] vidua, filia quondam Baptistae Ciarlae, absentes tamquam presentes etc., omnes de Urbino seu eius comitatu affines, et consanguinei seu coniunctae personae, bone memorie Raphaelis de Urbino pictoris clarissimi in Romana civitate nuper defuncti, pretenderent habere ius seu actionem super bonis et haereditatibus dicti quondam Raphaelis, ac Reverendos Patres dominos Balthazarem de Piscia et Joannem Baptistam Branchonum de Aquila Ss.mi domini nostri cubicularium secretum, executores ut asseruerunt testamentarii dicti quondam Raphaelis seu actuales bonorum possessores, de et super bonis et haereditatibus predictibus molestare eosque in judicium trahere vellent. Idcirco prefati domini executores, ac affines et consanguinei seu coniunctae personae predictae, ad obviandum litibus que super praemissis oriri possent, ac expensis quae hinc inde fieri contingerent, intervenientibus nonnullis probis viris communibus amicis, ad infrascriptam concordiam, transactionem, seu amicabilem compositionem venerunt. Videlicet, quod prefati domini executores darent et realiter et cum effectu solverent in pecunia numerata summam seu quantitatem mille ducatorum auri in auro de Camera inter eosdem consanguineos seu affines, aut coniunctas personas viritim distribuendi, ac affines et consanguinei seu coniunctae personae rederent omnia jura et actiones eis quomodolibet super bonis et haereditatibus predictis competentia in favorem dictorum dominorum executorum. Et propterea venerabiles ac spectabiles viri dominus Livius magistri Julii physici de Guidolotis, clericus prefati S.mi D. N. cubicularius, ac Franciscus Joannis Lucae prefatae dominae Magdalenae maritus, ac dictae dominae Constantiae procurator et legitimus administrator, necnon Joannes Baptista de Baldis layci, omnes de Urbino, procuratores, actores, factores, et negociorum infrascriptorum gestores, ac nuncii speciales vel generales prefatorum affinium, consanguineorum seu coniunctarum personarum dicti quondam Raphaelis, presentes, ac onus procurationis predictae in se ipsos sponte et libere suscipientes, prout de eorum mandato mihi notario infrascripto legitime constat instrumento, rogato per dominum Mattheum quondam Geni Venturae de Accomanis de Urbino de quadra Episcopatus publicum imperiali auctoritate notarium, sub die duodecima mensis novembris presentis anni 1520, ac indictionis octavae, et pontificatus eiusdem S.mi D. N. anni octavi, personaliter constituti coram prefato R.do domino Datario, ac in mei notarii publici et testium infrascriptorum ad haec specialiter vocatorum et rogatorum presentia, omni meliori modo, via, jure et causa, quibus melius et efficacius de jure potuerunt ac debuerunt, non vi, dolo aut aliqua sinistra machinatione seu sub dolo, fraude, sed sponte, libere et simpliciter, confessi sunt habuisse et recepisse, realiter et cum effectu, summam seu quantitatem predictam dictorum mille ducatorum auri in auro de Camera a prefatis dominis Baltazarre et Joanne Baptista executoribus per manus spectabilis viri domini Phylippi de Rodulfis mercatoris fiorentini, in romana civitate commorantis, de quibus quidem mille ducatorum procuratores predicti, nomine quo supra, pro eisdem affinibus, consanguineis, et coniunctis personis, eorumque et cuiuslibet ipsorum heredibus et successoribus, eosdem dominos executores, ac bonorum et haereditates dicti quondam Raphaelis possessores, in perpetuum quietarunt, liberavunt penitus et absolverunt, eisque finem, quietantiam et pactum solenne perpetuum de ulterius rem habitarum non petendo fecerunt. Renunciantes nomine quo supra iidem domini procuratores exceptioni dictorum mille ducatorum non habitorum, non numeratorum seu non receptorum, ac spei futurae habitionis, numerationis et receptionis, ac omnibus et singulis aliis exceptionibus, quibus contra premissa, vel aliquod eorum dicti d[omini] consanguinei affines, et coniunctae personae, se defendere possent quomodolibet, vel tueri. Absolventes et quietantes iidem domini procuratores nomine quo supra eosdem dominos executores in summa seu quantitatibus dictorum mille ducatorum auri, ac cassantes insuper et irritantes et annullantes quecumque, quotcumque et qualiacumque instrumenta, litteras et scripturas per quas et que constaret et constare posset dictos dominos executores, seu bonorum predictorum possessores, fuisse et esse temporibus preteritis et de presenti de quacumque pecuniarum summa premissa, vel alia quavis occasione seu causa quomodolibet obligatos ac debere et teneri, ita quod de cetero nullius sint roboris vel momenti. Et prefati domini procuratores nomine quo supra omnia jura, omnesque actiones reales et personales, utiles et directas seu mixtas, pretorias, civiles quod seu quas prefati consanguinei affines et coniuncte persone habent seu habere pretendunt aut possunt contra et adversus dictos dominos executores, seu bonorum possessores, de et super bonis ex haereditatibus dicti quondam Raphaelis, tam jure haereditario seu institutionis quam succesionis ab intestato, aut legatorum seu fidei commissorum specialium seu universalium, aut aliis in prefatorum dominorum executorum seu bonorum possessorum favorem, commodum et utilitatem in manibus mei notarii tamquam publicae et auctentice persone pro ipsis dominis executoribus, ac bonorum possessoribus, eorumque heredibus et successoribus, stipulanti ac recipienti dederunt, cesserunt, transtulerunt et seu mera, pura, libera, simplici, valida ac irrevocabili inter vivos donationem donarunt, renunciarunt et refutarunt, ac nomine quo supra promiserunt aliquid ulterius ex hereditatibus et bonis predictis, per se vel alium seu alios quovis quaesito colore, directe vel indirecte, non petere neque peti facere; ac eosdem dominos executores, seu alios bonorum possessores super bonis et hereditatibus predictis ullo unquam tempore non perturbare, molestare, seu inquietare, aut perturbari, molestari, seu inquietari facere. Et insuper prefati domini procuratores nomine quo supra voluerunt, et promiserunt mihi notario infrascripto tamquam publice et autentice persone, stipulanti ut supra, quod in eventum in quem reperirentur aliqui alii consanguinei seu affines, aut coniuncte persone, prefati quondam Raphaelis preterquam suprascripti Augustinus, Rodulphus, Ioannes Baptista, Magdalena, Constantia et Lucia, que in bonis et haereditatibus predictis tam ex testamento quam ab intestato aut alio quovis modo, seu quaesito colore, jus habere pretenderent, seu se habere habere [sic] jactarent: Et propterea eosdem dominos executores, aut alios bonorum possessores de facto vel de jure, aut alios quomodolibet molestarent, seu in jus traherent, qui Augustinus, Rodulfus, Ioannes Baptista, Magdalena, Constantia et Lucia prefati, et ipsorum quemlibet in solidum facient et procurabunt suis propriis expensis absque damno et expensis et jactura dictorum dominorum executorum, seu bonorum possessorum, quod dicti tales consanguinei, affines et coniuncte persone a dictis molestiis, jactationibus et lite cessabunt, eosdemque dominos executores, seu bonorum possessores in eorumdem bonorum et hereditatis dicti quondam Raphaelis pacifica possessione vel quasi dimittent, eosque in forma juris valida quietabunt et absolvent, ac damna, expensas et interesse per dictos executores, seu bonorum possessores propterea passos reficient integraliter et resarcient cum effectu, absque ulla diminutione, recusatione seu tergiversatione. Pro quibus omnibus et singulis firmiter et inviolabiter observandis, prefati domini procuratores nomine quo supra, eosdem Augustinum, Rodulphum, Ioannem Baptistam, Magdalenam, Costantiam et Luciam, ac eorum quemlibet in solidum in pleniori forma Camerae Apostolice obligarunt, ac jurisdictioni et potestati Curie Camere Apostolice, et quarumcumque aliarum curiarum, tam ecclesiasticarum quam saecularium ubilibet constitutarum submiserunt, subiecerunt etc. cum clausulis opportunis consuetis invenerunt etc., super quibus etc. Acta fuerunt hec Romae, in Palatio Apostolico in camera solitae habitationis prefati domini Baldassaris Datarii, praesentibus ibidem spectabilibus viris domino Bernardo Bino mercatore fiorentino, Hieronymo de Stacolis de Urbino, Gabriele Guidoloto, et Fabiano Branchonio de Aquila scriptore apostolico, testibus. Hippolitus de Cesis Not.o

Raphael’s procurator and executors in Urbino agree to disburse 1000 ducats from the painter’s estate.