• 145
  recto
• 145
  verso
• 146
  recto

Type:Notarial
Language:Latin
Transcription Author: Matteo Mazzalupi
Published: yes
Publication Details: Published by M. Mazzalupi, “Uno se parte dal Borgo … e va ad Ancona”. Piero della Francesca in 1450, in “Nuovi studi. Rivista di arte antica e moderna”, XI, 2006, 12, pp. 37-54, and by M. Mazzalupi, 'Regesto documentario', in Pittori ad Ancona in Quattrocento, edited by A. De Marchi and M. Mazzalupi, Milan 2008, pp. 334-372.

• Transcription

Testamentum domine Simone uxoris condam comitis Iohannis condam domini Francisci de F[errectis] de Ancona. Die XVIII mensis martii. Actum Ancone in domo infrascripte testatricis, posita Ancone in parochia ecclesie Sancti Petri iuxta res dicte domine testatricis et res heredum condam Petri Liberii de Bonarellis de Ancona, vias publicas et alia latera, presentibus Silvestro Iohannis de Aretio cive anconitano, Dominico Antonii Dominici, Petro Raffaellis de Cortesis, magistro Dominico Venture de Ancona, Laurentio Vitalis de Florentia, Dominico ser Guidi de Civitate Castelli et magistro Petro Benedicti de Burgo Sancti Sepulcri civibus et habitatoribus Ancone, testibus ad hec vocatis, habitis et rogatis. Domina Simona filia condam Filitiani Vannutii et uxor condam comitis Iohannis filii condam domini Francisci Liberocti de Ferrectis de Ancona, per Dey gratiam sana mente et sensu et in bona dispositione existens, licet corpore languens, timens Dey iudicium ac mortis periculum et humane nature fragilitatem, nolens intestata decedere, per hoc suum presens nuncupativum testamentum sine scriptis dispositionem omnium suorum bonorum facere procuravit et fecit, cum presentia, consensu et voluntate Petriiacobi Pauligeorgii Petrutii de Polidoris, proximi consanguinei dicte domine Simone ex latere patris, et Iohannis Petripauli Mecoli de Ancona, proximi consanguinei dicte domine ex latere matris, ut ipsa et ipsi asseruerunt, videlicet: In primis namque reliquit pro eius animam secundum precepta canonum solidos decem denariorum anconitanorum parvorum. Item reliquit pro male ablatis incertis solidos V denariorum. Item reliquit portui Ancone et ponti Fluminis Exini unum solidum denariorum pro quolibet. Item suam elegit sepulturam apud ecclesiam Sancte Marie Maioris sive Sancti Francisci de Ancona. Item reliquit Ypolito filio condam comitis Felicis condam comitis Iohannis de Ferrectis de Ancona ducatos quinqueginta auri. Item reliquit Martam, eius servam et sclavam, liberam et libertatem romanam donavit eidem Marte, cum hoc quod dicta Marta teneatur et debeat servire infrascripto eius heredi per sex annos proxime venturos et elapsis dictis sex annis, si dicta Marta vellet stare et habitare in domo, quod infrascriptus eius heres teneatur ipsam retinere et caltiare et vestire et facere expensas eius donec dicta Marta vivet in humanis. Item reliquit domine Riccabelle, domine Contesse, domine Iohanne et domine Diavelle filiabus dicte testatricis ducatos centum auri pro qualibet ipsarum. Item reliquit domine Cleofe filie condam comitis Francisci comitis Iohannis de Ferrectis de Ancona et uxori Stefani Dionisii Iohannis de Ancona ducatos quinqueginta auri. Item reliquit Iacobo filio dicti condam comitis Francisci ducatos centum auri, cum hoc quod dicte domine legatarie et dictus Iacobus non possint petere dicta legata et relicta nisi post mortem infrascripti eius heredis, si decesserit quandocumque sine filiis legitimis et naturalibus.