• 
  unpag

Type:Notarial
Language:Latin
Transcription Author: Adriano Franceschini
Published: yes
Publication Details: Published by A. Franceschini, Artisti a Ferrara in età umanistica and rinascimentale. Testimonianze archivistiche, II/1, Ferrara 1995, p. 608, app. 9.

• Transcription

In Christi nomine. Amen. Anno a nativitate eiusdem millesimo quadringentesimo quadragesimo, indictione tercia, die sexto mensis septembris. Magister Michael Nicolai Dini de Florentia, ad presens habitator civitatis Ferarie, scultor lapidarum et figurarum terre, per se et suos heredes et in presentia dicti ser Ludovici de Carelis notarii infrascripti et testium infrascriptorum promisit ser Lario quondam ser Iacobi di Manzolis civi et habitatori civitatis Mutine in cinquantina Castellarii, ibidem presenti, pro se et suis heredibus stipulanti et recipienti, facere unam tabulam la[ti]tudinis, qualitatis et condicionis et cum figuris pelenis [sic], caxamentis ac cornicis, solemniam, ac aliis apparentibus in tabula per ipsum noviter constructa in ecclesia Sancte Marie de Belflore noviter hedeficata per illustrem dominum nostrum marchionem prope mura civitatis Ferarie, omnibus suis suntibus et expensis colorum auri, azuri alamani optimi, ollei, blance et omnium aliorum, excepta merzede muratoris, calcina et lapidibus et vetura navium sive gabelarum si eam tabulam construi contingerit per eum in civitate Ferarie. Suis expensis exceptuatis dictus Laius solvere promisit dicto Magistro Michaeli condutori pro precio et nomine pretii dicte tabule sic constitute ut supra ducatos centum decem auri. Quam tabulam dictus Magister Michael facere et laborare promisit ac eam in et super dictum altare magnum ecclesie catedrallis ponere pictam auratam ut est tabula dicte ecclesie de Belflore omnibus suis expensis supradictis in civitate Mutine usque et pro termine mensis otubris anni millesimi quadragenteximi quadragesimi [primi] proxime futuri, si licentiam habere et impetrare poterit ab illustrissimo domino nostro accedendi Mutinam. Et si dicta licentia obteneri non possit, promisit eam laborare et facere in civitate Ferarie et eam, post enim factam, Mutine conducere et erigere ac integre supra dictum altare magnum ecclesie maioris Mutine infra dictum terminum omnibus suis expensis, exceptatis naulo et aliis superius exceptuatis, salvo quod si placeret dicto Ilario locatori allias figuras loco descritorum in ipsa tabula addere vel murare teneatur ipse magister Michael eas facere secundum voluntatem dicti Ilarii extendendo ipsam tabulam in latitudine prout est dictum altare magnum dicte ecclesie Mutine. Quam tabulam incipere debet in calendis mensis novembris proxime fucturi. Quam quidem promissionem et omnia et singula suprascripta promisserunt predicte partes sibi invicem et vicissim [...]. Actum Mutine in domo habitacionis hereditatis quondam Tome de Guidonibus, presentibus testibus ad hoc habitis, vocatis et rogatis, videlicet Opizone de Balugula, Philipo de Basso, magistro Petro Benediti de Burgo et Nicolao Habelandis omnibus [civibus] et habitantibus Mutine.