• 1
  recto
• 1
  verso

Type:Other text
Language:Latin
Transcription Author: Tom Henry
Published: yes
Publication Details: Published by Bologna 1896, pp. 126-29.

• Transcription

Leo pp. X. Ad futuram rei memoriam Ea que pro bono pacis et quietis inter ecclesuasticas personas concordia terminata fuisse dicuntur firma debent et illibata persistere, et propterea illa ne in recidive contemptionis scrupulum relabantur cum a vobis petitur libenter apostolico munimine roboramus: Sane pro parte dilectarum in Christo filiarum Abbatisse et Mathee Dominici Simonis Scaramuccie ac aliarum monialum seu sororum monasterii sancti Michelisangeli Cortonensis Cisterciensis ordinis, et dilecti filii Luce Venture de Signorellis civis cortonensis nobis nuper exhibita petitio continebat: quod alias Abbatissa et moniales prefate de expressa licentia et expresso consensu dilectii filii Baronis Francisci tunc vicarii tunc episcopi cortonensis, servatis servandis, eandem Matheam in monialem seu sororem dicti monasterii acceptarunt et receperunt et pro eiusdem Mathee dote prefatus Lucas florenos quadringentos ad rationem librarum quinque denariorum cortonensium pro quolibet floreno eisdem Abbatisse et monialibus solvere et satisfacere et cum effectu numerare promisit, factaque obligatione huiusmodi Abbatissa et moniales prefate unum locum preeminentie eidem Mathee deputarunt et consignarunt possessioneque dicti loci apprehensa prefatus vicarius eidem Mathee sub excomunicationis late sententie pena precepit, ut ipsa eidem loco cederet, et ad ultimum locum omnium monialium iret, a quo quidem precepto pro parte dicte Mathee ad felicis recordationis Iulium papam II predecessorem nostrum sanctamque sedem apostolicam appellato, et causa appellationis huiusmodi in Romana Curia commissa, et ea sic pendente Abbatissa et moniales ac Mathea et Lucas prefati ad infrascriptam devenerunt concordiam videlicet, quod Abbatissa et moniales prefate considerantes prefatum Lucam quam plurimas expensas in huiusmodi causa contra ipsas fecisse, eidem Luce de dictis quadringentis florenis ducentos remiserunt et eum ab illis penitus liberarunt, dictaque Mathea animadvertens nullam maiorem aut magis Deo gratam virtutem quam humilitatem esse, tunc eidem novo loco sibi, ut prefertur, deputato cessit, et ad ultimum locum se contulit, aliasque et alia fecerunt et gesserunt, pro ut in quodam publico instrumento desuper confecto plenius dicitur contineri: quare pro parte Abbatisse, Mathee et monialum ac Luce predictorum nobis fuit humiliter supplicatum, ut concordie predicte pro illius subsistentia firmiori robur apostolice confirmationis adijcere aliasque in premissis opportune providere de benignitate apostolica dignaremur: Nos igitur huiusmodi supplicationibus inclinati concordiam predictam ac pro ut illa concernunt omnia et singula in dicto instrumento contenta, quatenus tamen, licita et honesta ac sacris canonibus non contraria sint: nec non superiorum Abbatisse et Mathee ac aliarum monialum predictarum expressus accedat assensus auctoritate apostolica tenore presentium confirmamus et appobamus ac perpetue firmitatis robur tam in judicio quam extra illud habere decernimus supplentes omnes et singulos tam iuris quam facti defectus si qui forsan intervenerint in eadem: Non obstantibus constitutionibus et ordinationibus apostolicis ac instrumento et obligatione de quadrigentis florenis per Lucam factis et celebratis huiusmodi, statutis quoque et consuetudinis monasterii et ordinis predictorum iuramento confirmatione apostolica vel quavis firmitate alia roboratis, ceterisque contrariis quibuscumque: Datum Rome apud sanctum Petrum sub annulo Piscatoris die xxiii Martii MDXVII Pontificatus nostri anno quinto. E. Scutarius